ನವದೆಹಲಿ : ಭಾರತವು ಚಂದ್ರನ ಮೇಲೆ ಬಾಹ್ಯಾಕಾಶ ನೌಕೆಯನ್ನು ಇಳಿಸಿದ ಮೊದಲ ವರ್ಷಾಚರಣೆ ಅಂಗವಾಗಿ ಇಸ್ರೋ ವಿಶ್ವಾದ್ಯಂತದ ಸಂಶೋಧಕರಿಗೆ ಚಂದ್ರಯಾನ-3 ಮಿಷನ್‌ನಿಂದ ಸಂಗ್ರಹಿಸಲಾದ ತನ್ನ ವೈಜ್ಞಾನಿಕ ಡೇಟಾವನ್ನು ವಿಶ್ಲೇಷಣೆಗಾ ಶುಕ್ರವಾರ ಬಿಡುಗಡೆ ಮಾಡಿದೆ.
ಕಳೆದ ವರ್ಷ ಆಗಸ್ಟ್ 23 ರಂದು ಇದುವರೆಗೆ ಯಾರೂ ಅನ್ವೇಷಿಸದ ಚಂದ್ರನ ದಕ್ಷಿಣ ಧ್ರುವ ಪ್ರದೇಶದ ಬಳಿ ಸಾಫ್ಟ್ ಲ್ಯಾಂಡಿಂಗ್ ಮಾಡುವ ಮೂಲಕ ಇತಿಹಾಸವನ್ನು ಸೃಷ್ಟಿಸಿದ ವಿಕ್ರಮ್ ಲ್ಯಾಂಡರ್‌ನಲ್ಲಿ ಮೂರು ಮತ್ತು ಪ್ರಗ್ಯಾನ್ ರೋವರ್‌ನಲ್ಲಿ ಎರಡು ಒಟ್ಟು ಐದು ಪೇಲೋಡ್‌ಗಳಿಂದ 55 ಗಿಗಾಬೈಟ್‌ಗಳಿಗೂ ಹೆಚ್ಚಿನ ಡೇಟಾಗೆ ಬಾಹ್ಯಾಕಾಶ ಸಂಸ್ಥೆ ಪ್ರವೇಶವನ್ನು ನೀಡಿದೆ.
“ಈ ದತ್ತಾಂಶವು ಆ ಉಪಕರಣಗಳನ್ನು ರಚಿಸಿದ ವಿಜ್ಞಾನಿಗಳಿಗೆ ಮಾತ್ರ ಸೀಮಿತವಾಗಿರುವುದಿಲ್ಲ, ಇದರ ಫಲಿತಾಂಶವನ್ನು ಹೆಚ್ಚಿಸಲು ದೇಶ ಮತ್ತು ಪ್ರಪಂಚದ ಎಲ್ಲಾ ಸಂಶೋಧಕರಿಗೆ ಲಭ್ಯವಾಗುವಂತೆ ಮಾಡಲಾಗುವುದು” ಎಂದು ಇಲ್ಲಿ ಬಾಹ್ಯಾಕಾಶ ದಿನಾಚರಣೆ ಕಾರ್ಯಕ್ರಮದಲ್ಲಿ ಇಸ್ರೋ ಅಧ್ಯಕ್ಷ ಎಸ್ ಸೋಮನಾಥ್ ಹೇಳಿದರು.
ಚಂದ್ರಯಾನ-3 ಡೇಟಾ ಸೆಟ್‌ಗಳು ಭಾರತೀಯ ಬಾಹ್ಯಾಕಾಶ ವಿಜ್ಞಾನ ದತ್ತಾಂಶ ಕೇಂದ್ರದ ನೀತಿ-ಆಧಾರಿತ ಡೇಟಾ ರಿಟೈವಲ್, ಅನಾಲಿಟಿಕ್ಸ್, ಪ್ರಸರಣ ಮತ್ತು ಅಧಿಸೂಚನೆ ವ್ಯವಸ್ಥೆ (PRADAN) ಪೋರ್ಟಲ್‌ www.pradan.issdc.gov.in.ನಲ್ಲಿ ಲಭ್ಯವಿದೆ. ಪ್ರಗ್ಯಾನ್ ರೋವರ್ ಚಂದ್ರನ ಮೇಲ್ಮೈಯಲ್ಲಿ ರಾಸಾಯನಿಕ ವಿಶ್ಲೇಷಣೆಗಳನ್ನು ನಡೆಸಿತು, ಇದು ಚಂದ್ರನ ಮೂಲ ಮತ್ತು ವಿಕಾಸದ ಬಗ್ಗೆ ಉತ್ತಮ ಮಾಹಿತಿ ನೀಡಿತು. ಭವಿಷ್ಯದ ಚಂದ್ರನ ಪರಿಶೋಧನೆ ಮತ್ತು ಸಂಭಾವ್ಯ ಸಂಪನ್ಮೂಲ ಬಳಕೆಗೆ ಈ ಮಾಹಿತಿಯು ನಿರ್ಣಾಯಕವಾಗಿದೆ.
ಅಹಮದಾಬಾದ್‌ನ ಭೌತಿಕ ಸಂಶೋಧನಾ ಪ್ರಯೋಗಾಲಯದ (PRL) ವಿಜ್ಞಾನಿಗಳು ಚಂದ್ರಯಾನ-3 ದತ್ತಾಂಶವನ್ನು ಅಧ್ಯಯನ ಮಾಡಿದ ನಂತರ ಚಂದ್ರ ಶಿಲಾಪಾಕದ ದೈತ್ಯ ಸಾಗರದಿಂದ ವಿಕಸನಗೊಂಡಿದೆ ಎಂಬ ಚಂದ್ರನ ಶಿಲಾಪಾಕ ಸಾಗರ ಕಲ್ಪನೆಯನ್ನು ದೃಢೀಕರಿಸಲು ಪುರಾವೆಗಳನ್ನು ಒದಗಿಸಿದರು. ಶಿಲಾಪಾಕ ಅದು ನಂತರ ತಣ್ಣಗಾಯಿತು.
ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ರಾಷ್ಟ್ರೀಯ ಬಾಹ್ಯಾಕಾಶ ದಿನದಂದು ತಮ್ಮ ಭಾಷಣದಲ್ಲಿ ವಿಜ್ಞಾನ ಜರ್ನಲ್ ‘ನೇಚರ್’ ನಲ್ಲಿ ಪ್ರಕಟವಾದ ಭಾರತದ ಬಾಹ್ಯಾಕಾಶ ವಿಜ್ಞಾನಿಗಳ ಸಂಶೋಧನೆಗಳನ್ನು ಶ್ಲಾಘಿಸಿದರು.
ಇಸ್ರೋ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಗಮನಾರ್ಹ ಸಾಧನೆ ಮಾಡುವುದರ ಜೊತೆಗೆ ದೇಶದ ಸಾಮಾಜಿಕ ಮತ್ತು ಆರ್ಥಿಕ ಅಭಿವೃದ್ಧಿಗೆ ಅಮೂಲ್ಯ ಕೊಡುಗೆಗಳನ್ನು ನೀಡಿದೆ ಎಂದು ಅಧ್ಯಕ್ಷರು ಹೇಳಿದರು.
ಪೇಜ್ ಲೈಕ್ ಮಾಡಿ ಮತ್ತು ಸಬ್ಸ್ಕೈಬ್ ಮಾಡಿ